हेटौंडाः लगातारको वर्षासँगै मकवानपुर जिल्ला लिग फुटबल प्रतियोगिताको शनिबार हुने भनिएको फाइनल खेल स्थगित भएको छ । शनिबार मकवानपुर जिल्ला फुटबल संघले एक सुचना जारी गर्दै अर्को सुचना जारी नभएसम्मका लागि खेल स्थगित भएको हो ।
लिगको फाइनलमा उपाधिका लागि बागमती गाउँपालिकाको सहिद स्मृति टिम र पदमपोखरी युथ क्लब भिड्ने तालिका थियो । खेल हेटौंडा–५ स्थित पिप्ले क्याम्पा रंगशालामा शनिबार दिउँसो २ बजे हुने तय भएको थियो । तर लगातारको वर्षासँगै खेल खेलाउन नसकिने अवस्था आएपछि फाइनल खेल स्थगित गरिएको खेल संयोजक एवम् मकवानपुर जिल्ला फुटबल संघका उपाध्यक्ष युवराज लामाले जानकारी दिनुभयो ।
यस अघि न्यू कम्बाइन क्लबलाई टाइब्रेकरमा ६–५ गोलले हराउँदै सहिद स्मृति फाइनलमा प्रवेश गरेको थियो भने मनहरी गाउँपालिकाको हाँडीखोलालाई २–१ गोलले हराउँदै पदमपोखरी फाइनलमा प्रवेश गरेको थियो । प्रतियोगिताको उपाधि विजोता टिमले एक लाख रुपैयाँ सहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ५० हजार रुपैयाँ सहित शिल्ड मेडल तथा प्रमाणपत्र प्राप्त गर्नेछन् ।
