बागमती: मकवानपुरको पूर्वी बागमती गाउँपालिकाले आफ्नै लगानीमा फुटवल रङ्गशाला निर्माण गरिरहेको छ। वडा नम्बर ४ स्थित झुरझुरेमा निर्माणाधीन सहिद स्मृति रङ्गशालाको निर्माण कार्य अन्तिम चरणमा पुगेको छ । पालिकाले गत आर्थिक वर्ष २०८०/०८१ को असोज १७ गते ठेक्का आह्वान गरी रङ्गशालानिर्माणको काम अगाडि बढाएको हो ।
उक्त निर्माणाधीन रङ्गशाला सातौं संस्करणको बागमती गोल्डकप राष्ट्रिय फुटबल प्रतियोगितासमेत आयोजना गर्ने तयारीका साथ गाउँपालिका अघि बढेको छ। यसअघि प्यारापिटसहितको खेलमैदान नहुँदा पहिलोदेखि छैटौं संस्करणसम्म वडा नम्बर ८ स्थित जनता माविको खेल मैदानमा प्रतियोगिता आयोजना गरेको पालिकाले यसपटक भने आफ्नै रङ्गशालामा प्रतियोगिता गराउने तयारी गरेको हो। रङ्गशाला निर्माण आयोजनाको प्राविधिक अनुमानित लागत ३ करोड ७८ लाख १५ हजार ४ सय ८२ रुपैयाँ रहेको छ । आयोजनाको ठेक्का मकवानपुरको हेटौडा-५ को सञ्जय निर्माण सेवा प्रालिले पाएर अहिले काम गरिरहेको छ। आयोजनाको ठेक्का रकम ३ करोड ९ लाख ५२ हजार ७ सय ५७ रुपैयाँ रहेको छ ।
निर्माण कम्पनीले १५.९९ प्रतिशत न्यून रकम कबोल गरेर ठेक्का हात पारेको गाउँपालिकाका सवइन्जिनियर राजेन्द्र हादुर बोहराले जानकारी दिनुभयो । गाउँपालिका र निर्माण व्यवसायीबीच गत माघ ४ गते सम्झौता भएको र सम्झौताअनुसार आयोजनाको निर्माण कार्य चालु आर्थिक वर्षको माघ ३ गतेसम्ममा सम्पन्न गर्नु पर्ने सवइन्जिनियर बोहराले बताउनुभयो ।
रङ्गशाला निर्माण कार्य अहिले अन्तिम चरणमा पुगेको छ । हालसम्म रङ्गशालाको निर्माण कार्य करिब ८७ प्रतिशत सम्पन्न भएको अर्का सवइन्जिनियर काशी रावलले बताउनुभयो । अब बाँकी कार्य एक महिनाभित्र सकाउने निर्माण कम्पनीको दाबी छ। निर्माण सम्पन्न भएपछि रङ्गशाला दुबो हाल्ने र घेराबारका कार्य हुनेछ। सोही रङ्गशाला पालिकाले सातौं सस्करणको गोल्डकपसमेत आयोजना गर्ने तयारी गर्दैछ ।
२२ हजार ९ सय २५ वर्गमिटर क्षेत्रफलमा निर्माणाधीन रङ्गशालाको खेलमैदानको उत्तर-पश्चिम दिशामा ६२ मिटर लम्बाई र १२.५ मिटर चौडाईको प्यारापिट बन्दैछ । प्यारापिट करिब २ हजार ५ सय दर्शक अटाउने क्षमताको रहेको छ। अहिले रङ्गशालाको ट्रस (छाना) सहितको प्यारापिट, ड्रेन (नाला), फैन्सीङ वायरसहितको घेराबार, ड्रेस चेञ्जिङ रुम, शौचालयको निर्माण कार्य भइरहेको सवइन्जिनियर रावलले जानकारी दिनुभयो।
