बागमती : मकवानपुरको पूर्वी बागमती गाउँपालिकाको खेलकुद विकास समितिको अध्यक्षमा रहर सिं थिङ नियुक्त गरिएको छ । गत असार ३ गते बसेकाे गाउँ कार्यपालिकाकाे बैठकबाट निर्णय भए अनुसार आज सोमबार थिङलाई समितिको अध्यक्ष पदमा नियुक्त गरिएको जनाईएकाे छ ।
निवर्तमान अध्यक्ष टिकालाल श्रेष्ठको स्वेच्छिक राजिनामा पश्चात भएको रिक्त पदमा थिङलाई गाउँपालिका अध्यक्ष सर्केश घलानद्वारा आज नियुक्ती-पत्र प्रदान गरिएको हो ।
बागमती गाउँपालिकाको खेलकुद सम्बन्धी कार्यविधि, २०७७ को दफा ४ (क) बमोजिम गाउँ कार्यपालिकाको गत असार ३ गतेको बैठकबाट थिङलाई समितिको अध्यक्ष पदमा नियुक्त गर्ने निर्णय भए अनुसार नै आज नियुक्त गरिएको गाउँपालिका अध्यक्ष घलानले जानकारी दिनुभयो ।
थिङ बागमती गाउँपालिकाको वडा नम्बर ४ को निवर्तमान वडा अध्यक्ष पनि हुन् । स्थानीय तहको पहिलो निर्वाचन २०७४ मा उनी नेकपा माओवादी केन्द्रबाट वडा अध्यक्षमा निर्वाचित भएका थिए । अध्यक्ष समाज सेवामा सक्रिय रहेका छन् ।
बागमती गाउँपालिका खेलकुद विकास समितिको थिङ चौथो अध्यक्षमा नियुक्त भएका छन ।बागमती खेलकुद विकास समितिको पहिलो अध्यक्ष पदकाे लागि अरुण लामा बल, दोस्रो भिम बहादुर राई, तेस्रो टिकालाल श्रेष्ठलाई नियुक्त गरिएका थिए ।
बागमती गाउँपालिका खेलकुद विकास समितिले राष्ट्रिय स्तरको बागमती गोल्डकप सञ्चालन गर्दै आएको छ । हालसम्म राष्ट्रिय स्तरको बागमती गोल्डकप छैठौं संस्करणको फुटबल प्रतियोगिता २०८० सफलता पूर्वक सम्पन्न गरिसकेको छ ।
