मकवानपुर । माओवादी केन्द्रको जनताको घरघरमा पुग्ने अभियान जारी रहेको नेपाल कम्युनिष्ट पार्टी (माओवादी केन्द्र) का मकवानपुर जिल्ला संयोजक सर्केश घलानले बताएका छन् । बुधबार हेटौंडा–१३ नम्बर वडा कमिटिको दोस्रो वडा सम्मेलनमा बोल्दै बागमति गाउँपालिका अध्यक्ष समेत रहेका संयोजक घलानले सो कुरा बताएका हुन् । पार्टी केन्द्रले घोषणा गरिएको चार महिने अभियान अन्तिममा पुगे पनि जनताको घरदैलोमा नियमित पुग्ने अभियान निरन्तर रहने उनले उल्लेख गरेका हुन् ।
पार्टीले सञ्चालन गरिएको चार महिने अभियानपछि माओवादी केन्द्रप्रति जनताको थप आकर्षण बढेको उनले दावी गरे । अन्य शक्तिहरुले केहि समय भ्रमित पारे पनि सत्य तथ्यका बारेमा केन्द्रले अभियान मार्फत जनतामा सचेतना प्रदान गरिएपछि थप आकर्षण बढेको उनको कथन छ ।
यस्तै, सम्मेलनमा बोल्दै माओवादी केन्द्र बागमति प्रदेश कमिटि सचिवालय सदस्य एवम् जिल्ला समन्वय समिति मकवानपुरका प्रमुख ललित घलानले पार्टी पङ्ती जनतासँग घनिभूत रुपमा जाोडिनुपर्ने बताएका छन् । गरिबका छोराछोरी उच्च तहमा पुगेको, गाउँ गाउँमा सरकारको उपस्थिति भएको परम्परागत शक्तिहरुले मन नपरेको र परिवर्तनको विरोध गरिरहेकोप्रति सचेत रहनुपर्ने उनले उल्लेख गरेका छन् ।
यसअघि माओवादी नेतृत्वको सरकारले ऋण मिनाहा गरेको विषय पुनः स्मरण गराउँदै प्रमुख घलानले अबको लक्ष्य गरिबीको अन्त्य र आर्थिक समृद्धि भएको हुँदा त्यसैमा केन्द्रित भएर अघि बढ्नुपर्ने बताएका छन् ।
यसैगरि, सम्मेलनमा बोल्दै माओवादी केन्द्र हेटौंडा उपमहानगर कमिटिका उपाध्यक्ष प्रदिप अर्यालले माओवादी केन्द्रले आफ्नै चुनाव चिन्हमा निर्वाचन लडेर विजयी बनेको जनताले देख्न चाहेको बताएका छन् । उनले माओवादीको नेतृत्वमा व्यवस्था परिवर्तन भएको र क्षेत्रगत रुपमा विकास भइरहेकोमा आत्मसात गर्नुपर्ने पनि उल्लेख गरेका छन् ।
कार्यक्रममा माओवादी केन्द्रका हेटौंडा उपमहानगर कमिटि इन्चार्ज विवेक राई, अध्यक्ष तिर्थ थापा मगर, वाइसीएल हेटौंडा उपमहानगर कमिटि अध्यक्ष मदन उप्रेतीसहितको उपस्थिति थियो ।
