मोटरसाइकल दुर्घटनाबाट मकवानपुरको बागमती गाउँपालिकाका एक युवकको मृत्यु भएको छ l मृत्यु हुनेमा बागमती गाउँपालिका वडा नं.६ ठाडीखोला बस्ने २२ बर्षीय सन्तोष दर्लामी रहेका छन् ।
गत बुधबार मदन भण्डारी लोकमार्ग अन्तर्गत मकवानपुरको बागमती गाउँपालिका वडा नं.७ स्थित लामिटारमा मोटरसाइकल दुर्घटना भएको थियो l बागमती गाउँपालिका वडा नं. ४ झुरझुरे तर्फबाट हेटौंडातर्फ आउँदै गरेको ना.३० प ३४८१ नम्बरको मोटरसाइकल आफै अनियन्त्रित भई बिजुलीको पोलमा ठोक्किएर दुर्घटना भएको थियो । दुर्घटनामा परी सन्तोष र मोटरसाइकल चालक बागमती गाउँपालिका वडा नं.६ ठाडीखोला बस्ने २२ प्रदिप लोप्चन घाइते भएका थिए ।
जिल्ला प्रहरी कार्यालय मकवानपुरका अनुसार घाइते सन्तोषलाई उपचारका लागि हेटौंडा अस्पतालमा ल्याईएको थियो भने प्रदिपले स्थानीय मेडिकलमा उपचार गराएका थिए ।
गम्भीर घाइते भएका सन्तोषको हेटौंडा अस्पतालमा उपचार सम्भव नभएपछि काठमाडौंस्थित अन्नपूर्ण न्यूरो अस्पताल लगिएकोमा राती साँढे १० बजेर ३० मिनेटमा डाक्टरले मृत घोषणा गरेको जिल्ला प्रहरी कार्यालय मकवानपुरका प्रहरी नायव उपरीक्षक लक्ष्मी भण्डारीले जानकारी दिए ।
मोटरसाइकल चालक प्रहरीको सम्पर्कमा आएको र घटनाको बारेमा अनुसन्धान भइरहेको प्रहरीले जनाएको छ ।
