गोरखा । गोरखा अस्पतालका मेडिकल अफिसर डाक्टर अविनाश पराजुलीलाई कार्यकक्षमै कुटपिट गरेको आरोपमा प्रहरीले तीन जनालाई पक्राउ गरेको छ ।
गएको कात्तिक छ गते ओपिडीमा काम गरिरहेका पराजुलीलाई हातपात गरेको आरोपमा उनीहरु पक्राउ परेका हुन् । पक्राउ पर्नेमा गोरखा नगरपालिका वडा नम्वर–९ का २८ वर्षका समीर कुँवर, १९ वर्षका अनुप बस्नेत र गोरखा नगरपालिका वडा नम्वर–३ का २६ वर्षका प्रमोदजंग कुँवर रहेका जिल्ला प्रहरी कार्यालय गोरखाले जनाएको छ ।
सार्वजनिक बिदा सकिएपछि म्याद थप गरि कारबाही प्रक्रिया अघि बढाइने जिल्लाका प्रहरी प्रमुख एसपी केदार खनालले बताउनुभयो । थाइराईडको नियमित परीक्षणका लागि आएकी एक महिलालाई डाक्टर पराजुलीले यसअघि परीक्षण गरिएको रिपोर्ट ल्याउन भनेको तर बाहिर निस्किएकी ती महिलाले युवा बोलाएर कुटपिट गराएको डाक्टर पराजुलीको भनाई छ । गोरखा अस्पतालले किटानीसहित उजुरी दिएको थियो ।
